بقلم: محب وفاوي
هذا الصباح محبي الواف كلشي صبح كايهضر على الحلقة لي دازت البارح فالراديو و كان الضيوف ديالها مول المانيطا و السيسي ، الحلقة لي حشماتنا بسبب طريقة ايصال المعلومة ، مول المانيطا نقدر،و نعدروه بسبب انه ماعندوش واحد الثقافة رياضية كبيرة و لكن لقيناه فوقت الحزة ، و التصريحات ديالو مبنية على التقارير لي كايسيفطو ليه من فاس لكازا ، و لي أغلبها تقارير عامرة بالمغالطات و الكدوب لي غاية في نفس يعقوب ، ماشي اجتماع مولاي يعقوب ، غير كونو هانيين ، هداك دبا يجي وقتو و نرجعو نشرحو شنو داز فيه ، يلا كان Boss قال بلي الفرقة تحولت لشركة ، علاش مازالين غاديين بقانون المنخرط ، لي كاين فيهم ماعمرو طلع التيران ، الدور ديالو الوحيد يهز يدو نهار الجمع العام و يشكل الاغلبية ، و كيفاش الفرقة ماطلعتش القسم الاول بسبب اللاعبين الشبان ماعندهومش التركيز الذهني ، علاش ماتقولوش مساكن هاد الدراري ماعندهومش مساكن التركيز الجيبي حيث ضاحكين عليهم بجوج دريال ، يمكن حنا الفريق الوحيد في المغرب لي فيه اللعابا ولاد الفرقة و هازين الفرقة و رسميين ، كايتخلصو بصالير قل من وحدين في الفرقة ماعندهومش تا الباك ، و لكن كاين باك صاحبي ، نهار لي جريتو على القطيبي و الكارتي حقا مصلحة الواف فوق اي واحد و مكايناش العاطفة ، و في قضية الحياح صم بكم هم لا يقشعون ، نجيو للتصريح ديال السيسي لي افتخر بلي 50 سنة و هو في الفرقة ، يعني خاص تكون شبعان خبرة ، طلع الفرقة للقسم الاول عندك بحال يلا كاتكول كاوكاو ، راه السبتي طلعها فعام ، و لعبها في القسم الاول بمدربين كبار و لاعبين كبار ، و نتوما بقيتو عليه بالحفير le quotidien ، و مع الاسف مشينا معكم في التضليل و هاديك اكبر غلطة درناها ، و ها حنا تانخلصو تبعات ديالها ليومنا هذا ، عششنا في القسم الثاني ، و معكم غانبقاو فيه 70 عام اخرى ، حيث ماعندكوم ماتزيدو ، من غير مول optic و Cnss و hotel ، هذا 3 لي مساكن كايتقاتلو كلها و جهدو ، الحمد لله حنا متابعين جمعية ولا حزب سياسي باش تلصقو لينا شي كدبة انتماء كيف ولفنا الاشاعات ، حنا بغينا الفرقة تكبر ، ولي كايبان انكم صغرتوها لواحد الدرجة مكاتصورش ، السيسي كيفاش كاتقول لينا الفرقة كاتخسر 800 مليون فالعام على الفريق الاول ، و في التقرير المالي كالقاو مليار و نص ، autres charges ? ، و داك 800 مليون فين كاتمشي راه بريم سينياتور مكاتعداش 150 مليون ، و لا ماس سالاريال 25 مليون شهريان ، و بريمات ديال الهواة ، مخنا حبس ، برافو السيد لي دار الحلقة راه كان ذكي و شحال من مرة عاود الاسئلة فاش شاف كاين هروب و مراوغة ، و قريب ان شاء الله غادي دخل الصحافة المحلية على الخط ، و موراه ان شاء الله السلطة باش تدير حد لهذا هبل تربح ، باش نشوفو قصة عطيتو كيطما فين غاتوصل … يتبع خلاها گوگو
